Ua lē toe iai se saolotoga e faimalaga ai tagatanuu Vanuatu i Peretania, ma o se faanoanoaga tele i le malo o Vanuatu le faamuta e aunoa lava ma nisi talanoaga.

Ua lipotia o lea ua feiloai le minisita o le va i fafo a Vanuatu ma le Hai Komesina o Peretania i lea atunuu e talanoa le faaiuga ua faia nei e Peretania.

Mai le minisita o le va i fafo a Vanuatu, o lea lava e taumafai la latou faigamalo e faamalieina aiaiga o loo sau i lea saolotoga e pei ona faia ai e le Iuni a Europa.

O le lavelave o le mataupu lenei o lea e lē o toe iai Peretania i le iuni, ma o lea foi ua aveesea e le Council a le Iuni a Europa le saolotoga lava foi e tasi na ia tuuina mai ia Vanuatu e pei ona aloaia ai ia Fepuari.

Peitai i se tali mai a le sui o Peretania e tusa ma lipoti a le leitio a Niu Sila, e le faapea a mea e lē o lelei faiga faapaaga i le va o atunuu e lua, peitai o se faaiuga ua faia e le gata o puipuiga o tuaoi ae ona ua iai faamaoniga o le agavaa ai o nisi o tagata i avanoa sitiseni ma o nisi o i latou nei e ono lamatia ai le saogalemu o tagata Peretania.

O le aso 19 o le masina lenei na aloaia ai le suiga ua faia e Peretania.