Ua faamuta e le tamaitai Palemia Fiame Naomi Mataafa le avea ai o Savalenoa Mareva Betham Annandale ma Loia Sili o le Mālō lea na faamalolo lē tumau nei ona o nisi o mafuaaga.
Faamaonia mai i ripoti a nisi o Ofisa faasalalau i Samoa o le asō na faia ai lea faaiuga ma ua tofia ai Su’a Hellene Wallwork e avea ma Loia Sili i le taimi nei ao tālia ai le sailiga o se isi e tulai i le tofi.
O lea faaiuga na faailoa mai i se pepa o faamatalaga na tuuina atu e le Palemia faailoa ai mafuaaga o le faamuta ai o le auaunaga a le Loia Sili ma e faamamalu lava i le asō Asō 2 Setema (effective immediately)
Taua e Fiame i lea pepa o faamatalaga ua leai se faatuatuaga i le Loia Sili e na te faaauauina ai le tofi.
O le pepa o faamatalaga lenei mai le Tamaitai Palemia:
FA’ASALALAUGA FA’ALAUA’ITELE.
FA’AIUGA E TUSA O LE LOIA SILI, ASO TOFI 02 IULAI 2021.
I le aso 20 o Aukuso 2021, na ou tusi ai ile Loia Sili, Savalenoa Mareva Betham Annandale, mo sona finagalo i so’u manatu ua siligia ai lo’u talitonuina ma le fa’atuatuaina o lona tau’aveina o tiute o le Ofisa o le Loia Sili a le Malo.
Na ou fa’ailoa foi, ua fa’amaloloina lē tumau e le Ao o le Malo ia le Loia Sili ma tofia ai se tasi o le Ofisa o le Loia Sili e tau’aveina tiute o le Ofisa a o fa’atali se fa’aiuga.
Na ‘ou fesiligia le Loia Sili mo sana tali e tusa so’u manatu e aofia ai atugaluga nei:
• O mataupu i le Fa’amasinoga ma nisi o mea na tula’i mai e soso’o ma le Faigapalota Tele ia Aperila, lea na fa’aalia ai – e aunoa ma le faitioina o le Ao o le Malo – sa le lelei le fautuaga na tu’uina atu ma fete’ena’i ai ma le Fa’avae;
• O amioga ma uiga fa’aalia o le Loia Sili i luma o le Fa’amasinoga Maualuga, e pei o le teva ‘ese ao tagofia e le Faamasinoga le mataupu i le masina o Me, ma faia ai se fa’asalalauga fa’alaua’itele na matuā faitioina ai le Fa’amasinoga e fa’asao ai uiga na ia fa’aalia.;
• Isi uiga le fa’aaloalo i le Fa’amasinoga ma le leai o sana gaoioga, (mo se fa’ata’ita’iga), e fa’asa’o faitioga a lē sa avea ma Palemia, pe fa’amavae foi e fa’aalia ai lona tete’e;
• Ma le leai o sana tali i osofaiga faifaipea e ta’u fa’atauva’aina ai le Fa’amasinoga.
O nei mea uma, ua lē ‘ausia ai le maualuga o lo’o o’u naunau iai mai le Ofisa o le Loia Sili.
Oute manatu foi, atonu o nisi o nei mataupu, e afua mai i fa’atonuga a lē sa avea ma Palemia. Ae peita’i, o lo’u fa’anaunauta’iga, o le Loia Sili, e tatau ona tula’i e puipui le tulafono, e aofia ai ma le fa’amavae ma le tofiga, pe a ua talafeagai.
Na tu’u atu le avanoa iIe Loia Sili mo sona finagalo e tali mai i totonu o aso e sefulu lea na atoa ile Aso Gafua, 30 o Aukuso. Na ave foi iai le fa’atonuga e fa’aaoga se fautuaga faa-loia e totogi e le Malo pe afai e mo’omia ma avanoa ai foi fa’amaumauga uma na te mo’omia e tapena ai sona finagalo.
O lea la ua maua mai le finagalo o le Loia Sili ma ua fa’apea mai:
• E le o i le Ao o le Malo, po’o a’u foi, le malosiaga fa’a-le-tulafono e fa’amalolo ai fa’a-vaitaimi pe fa’ate’a ai foi se Loia Sili.
• Ua fa’apea mai foi, e le mafai ona ou faia sea fa’aiuga ona oute ono fa’aitua’u ona o mataupu sa i luma o le Fa’amasinoga i masina ua tuana’i atu.
• Ma le talosaga fa’aiu, e tu’u atu se taimi fa’aopopo e tu’uina mai ai sana tali i mataupu na ou tu’uina atu.
Ua ou lē talia Ie tali ma le finagalo tusitusia o le Loia Sili ua tuuina mai.
• Oute lē talia Ie manatu e lē mafai ona fa’ate’a se Loia Sili mai lona Ofisa. So’o se ‘au’auna e umia tofiga e tautuaina ai le atunu’u, e mafua ona umia lenā tofiga, ona o le talitonuga ma le fa’atuatuaga a tagata lautele o Samoa. O le Loia Sili, o le Faufautua Sili i le Malo ma le Kapeneta, ma e tatau ona iai le talitonuina ma le faatuatuaina e le Malo.
• Oute fia fa’amamafaina foi Ie itu lenei. E le o ni mataupu fa’a -polokiki poo Vaega Fa’aupufai le mataupu lenei. E pei o le fa’ata’ita’iga ua ou tu’uina atu, e le talafeagai i lo’u manatu le teva ma savali ‘ese o so’o se loia mai se mataupu a o lo’o tagofia e le Fa’amasinoga. E le o se mataupu fa’apolokiki ae o tulaga maualuga e ao ona ausia o loo taumafai iai au nei ma la’u faigamalō.
Ua ou Iē talia foi se taimi fa’aopopo. O mataupu na ‘ou tu’uina atu o lo’o lausilafia lelei e le Loia Sili ma e mafai lava ona tali vave mai iai. Oute manatu foi, e le o se tulaga talafegai le so’ona toso umi a o loo nofo faatali lo tatou atunuu lautele.
E tusa o mataupu ma mafua’aga na ou tuuina atu atoa ai ma le tali mai a le Loia Sili, ua tonu ai la’u faaiuga e fa’apea.
Oute fautuaina le Ao o le Malo ina ia faate’a le Loia Sili e afua atu ile asō, Aso Tofi, 02 o Setema 2021.
O le a fa’aauau pea lē o loo Sui Loia Sili seia aulia le Aso Faraile 03 o Setema. Peita’i, o le a ou tofia se Loia Sinia na te tau’aveina tofiga o le Loia Sili mo se vaitaimi ina ia avanoa ai le sailia o se tasi na te tau’aveina lenei tofiga taua fa’a-le-Faavae, e ala i le fa’asalalauina o le avanoa.
Mo le gasologa lelei mo le tautuina o le tatou atunu’u, ua ‘ou fautuaina foi le Ao o le Malo ina ia tofia ia Su’a Hellene Wallwork e avea ma Loia Sili o Samoa e afua atu ile Aso Toonai, 04 Setema 2021, mo se vaitaimi pe tolu i le ono masina a o sailia se tasi agavaa e tauaveina lenei tofiga taua mo le tolu tausaga.
O Su’a Hellene Wallwork, na iu mai o se Loai mai le Iunivesete o Aukilani ma ua 22 tausaga o galue o se loia. Na amata ona galue faa-loia i le Ofisa o le Loia Sili o Samoa, ona soso’o ai lea ma le 12 tausaga na galue ai o se loia i tulaga ‘ese’ese i Niu Sila, e aofia ai le Matagaluega o Leoleo ma sa avea foi ma Loia Faufautua Sinia ile Komisi o Fefa’ataua’iga a Niu Sila. Na toe foi mai i Samoa ma lona alii o Travis Lamb, ma fa’atuina ai le Ofisa Loia o le Wallwork Lamb Lawyers ile 2013.
E tele foi ni galuega na ofo fua ai lana tautua i Samoa nei ma sa avea foi Su’a ma Peresetene o le Faalapotopotoga a Loia a Samoa mai le 2017, avea ma Sui Peresetene mo le 3 tausaga, seia oo ina toe tofia e avea ma Peresetene i le masina na te’a nei.
O le tausaga e 2008 na fa’ae’eina atu ai ia te ia le suafa Su’a e lona aiga i Gaga’ifolevao, Lefaga, ma o lo’o fa’aauau ai lana tautua i lona aiga ma le nu’u.
Ua talia e Su’a lona tau’aveina o lenei galuega taua. O ia ose loia tuto’atasi o lo’o naunau e tu’uina mai sona sao aemaise i lenei vaitaimi faigata ma le ma’ale’ale o suiga o pulega malo.
Ma e momoli ai la’u fa’afetai i le afioga a Su’a i lona finagalo e talia lenei vala’au ma fa’afetaia ai foi lona alii ma o la alo ma le aiga ona e taua la latou lagolago mo lenei galuega taua.
I soo se atunuu temokalasi lava, e ao ona galulue faatasi le Palemia, Minisita o le Kapeneta ma e o loo umia tofiga o Faauluuluga ma tulaga Sinia o Matagaluega a le Malo.
E ao foi ona iai le talitonuga ma le faatuatuaga ma e moomia ai tagata faigaluega uma e faatino a latou tautua ise tulaga tutoatasi, ma ia ausia ai tulaga maualuluga e moomia mo so’o tautua i le tatou atunu’u lautele.
E fa’apena foi le tulaga o lo’o moomia e lo tatou Malo mai Matagaluega uma ma Fa’alapotopotoga a le Malo, ina ia o tatou tautua fa’atasi lo tatou atunuu ma tagata uma o Samoa.
Afioga a Fiame Naomi Mata’afa
PALEMIA MA LE MINISITA O LE OFISA A LE LOIA SILI.
