Ua lipotia e le ABC i le aso ananafi ua agai ese le kamupani a le Linx Employment mai le PALM Scheme poo le Pacific Australia Labour Mobility, le faiga lea sa aumai ai tagata faigaluega mai le Pasefika e galulue i Ausetalia ae ua leiloa ai nei le tulaga e iai nai tagata faigaluega.
Fai mai le lipoti e silia ma le 200 tagata faigaluega mai le Pasefika o loo aafia i le mataupu lenei ina ua faamuta le auai o le Linx Employment i le scheme lea aemaise foi nisi o suesuega o loo faia i le treatment poo le faiga o nai ia tagata faigaluega.
O le kamupani lea e mai Tasmania ma ua manino mai i le lipoti o loo suesue nei e le Fair Work Ombudsman poo le Komesina o Sulufaiga mo Galuega Talafeagai ona o tuuaiga ua lēmafai ona o latou saunia le 30 itula faigaluega mo tagata faigaluega e pei ona faatulafonoina ia latou konekarate, 30 itula faigaluega i le vaiaso.
Ua ta’ua i le lipoti se faamatalaga mai le kamupani lea a le Linx o loo galulue faatasi nei ma le Matagaluega o loo feagai ma le polokalame ina ia sailia ni tulaga e fesoasoani ai i tagata faigaluega.
