Search
Search
Photo Credit: Manu Samoa Fb

Faamuamua e le Faiaoga a le Manu Samoa 15 le lagolago a le atunuu mo le Manu Samoa

O le filifilia ai o le susuga ia Mase Mahonori Schwalger e fai ma faiaoga fou o le Manu Samoa 15, ua ia saunoa ai o lea a ave lana faamuamua i ni auala e toe tatai mai ai le lagolago ma le lotonuu a le mamalu o le atunuu i lana Manu Samoa. 

O lana vaavaai muamua lena o le toe taumafai lea ia toe momoli le ‘au a le Manu Samoa i le atunuu ina ia toe maua le galulue faatasi a le ‘au ma le atunuu i le taimi nei. 

O lona talitonuga o lenei galuega o le faiaoga taiulu i le Manu Samoa, e lē o se galuega faigofie, o le ala lea o le talosaga i le atunuu ma nisi o uso o loo faiaoga i nisi o ‘au i Niu Sila ma Ausetalia e manaomia le fesoasoani e galulue ma pulupululima faatasi ai auā se manuia o le ‘au a le atunuu le Manu Samoa. 

O loo vaavaai foi le pulega o le Manu Samoa ma le susuga ia Mase Mahonori Schwalger i se faiaoga lagolago la te toalua i le taimi nei, ae o loo iai lava le naunautaiga o le susuga i le faiaoga e tatau ona iai ni faiaoga Samoa e auai i le faiaogaina o le Manu Samoa. 

Ae ina ua mae’a le Ipu o le Lalolagi i le tausaga ua mavae, ua faaalia ai e le susuga ia Mase le lagona faanoanoa o le ‘au sa iai, aemaise o le tapuaiga a le atunuu ona e lei ausia se tulaga lelei sa iai le Manu Samoa i le Ipu o le Lalolagi, ae e aogā mea sa tutupu e toe maua ai isi lagona lelei e toe tapena ai le ‘au mo le agai i luma. 

O le taimi nei o loo maua le avanoa mo tama taaalo e auai atu ai mo le ‘au a le atunuu auā nisi o taaloga a le Manu Samoa mo lenei tausaga, ae o loo iai foi le silasila a le faiaoga mo alo ma fanau o loo taaalo i le Moana Pasifika i le Super Rugby o loo faagasolo nei auā nisi tama o le ‘au. 

O Iulai o loo tapena ai le Manu Samoa i ana taaloga muamua i totonu o Samoa o le a taaalo ai ma Italia ma Spain ona sosoo ai lea ma le Pacific Cup e aofia ai Samoa, Fiti, Tonga, Iapani ma Kanata ona faamulimuli lea i le tua a le Manu Samoa e alu i Europa.

Tala sili ona faitaulia

POLOKALAME A LEOLEO

Tala mai samoa

TALA FOU MAI SAMOA

TALA MAI NIU SILA

SAMOA UPDATE

PODCASTS

Listen on

FAATALATALANOAGA

Keep uptodate with Radio Samoa activity & promotion

* indicates required