Ua faamavae le minisita o fefaataua’iga a Niu Sa Uelese, o Stuart Ayres mai le kapeneta atoa ai ma lona tofiga o le sui ta’ita’i o le pati a le Liberal ma ua faamaonia lea i se folafolaga mai le premier o le setete, Dominic Perrottet.
Ua tulai mai lea tulaga i le mae’a ai o le tulituliloa pea e le to’atele o le mataupu e aofia ai lē sa avea muamua ma sui premier o le setete, o John Barilaro ma le avanoa i le itu tau fefaataua’iga mo se sui o Ausetalia i Niu Ioka lea sa su’esu’eina e le komisi su’esu’e.
Sa teena lava e le minisita ua faamavae nei lona solia o se tulafono i le mataupu lea peitai o lea ua faailoa mai le faamavaega i le aso ananafi.
O le a tumau pea ona avea ma faipule o Penrith ma ua faailoa e le premier o le a toe faasee atu tofiga na iai o le minisita i se tasi o le a filifilia e sui tulaga ae ua faailoa foi e le premier o loo faatumauina pea le teena e le minisita o se gaioiga sese na ia faia i le mataupu e pei ona faailoa.
