Ua talia e le Palemia o Peretania tala e faamavae ma le tofiga. 

I le saunoaga aloaia a le Palemia Boris Johnson anapo na ia ta’utino ai ua manino le mana’o o la latou pati ua tatau ona faamavae. 

I lea lava saunoaga ua amata faagasolo ai fuafuaga o le sailia o se isi taitai fou o le Conservative Party ma o ia foi lea o le a suitulaga ia Johnson ma e ono faia uma nei suiga i le tau mafanafana lea e uma ia Setema. 

Ae e le’i saunoa le Palemia e faailoa ai le faai’uga ua iai, e le’i faigofie ona talia e Johnson talosaga ua tatau ona faamavae ma o lona tetee lea ua faamavae ai le tusa ma le 50 sui faipule ona o le lē fiafia ma lē talitonuina ta’ita’iga a le latou Palemia. 

A o faamamulu ai e Johnson lona tofi ta’ita’i o le pati ae uu pea le tofi Palemia e faatali ai le Palemia fou, mai le to’atele o loo fesiligia pe aisea e lē see ane ai lē o loo sui palemia mo le taimi nei ae alu ese motu loa Johnson. 

O Johnson na amata auauna mai i le 2019 o le Palemia o Peretania.