O le a faasee ese Dr Ashley Bloomfield mai lona tofiga o le faatonu o le soifua maloloina lautele ile faaiuga o le masina o Iulai ma ua faamaonia ise pepa o faamatalaga mai le Public Service Commissioner, Peter Hughes ua tuuina mai I le au faasalalau ile vaiaso nei.
Ua taua ile pepa o faamatalaga e lagona e Bloomfield e oo atu ile masina o Iulai o se taimi talafeagai lea e laa ese ai ma lona tofiga mo se malologa. Pei ona silafia o le faatonu ua masani ona feagai pea ma le au faasalalau mo lipoti o le koviti talu ona aafia ai le atunuu ma ua faailoa e le komesina o galuega lautele sa galue malosi Bloomfield mo le silia ma le lua tausaga e faatumauina le saogalemu o tagata niusila mai le koronavairusi.
Faafetaia ai e le komesina le onosai ma le tautua a Bloomfield ma lona sao I le puipuia o niusila mai le faamai.Sa faailoa foi le agaga faafetai o le palemia e pei ona tuuina ai sana faamatalaga I luga ole social media ua faafetaia ai le sao o Bloomfield I le tetee atu o le atunuu I le koviti 19. Fai mai nisi lipoti ua faailoa e Bloomfield ua fia maua se taimi e mafuta ai ma si ona aiga ma fai mai le palemia o se tulaga ua talafeagai.
O le a tofia la e le komesina o galuega lautele se faatonu lagolago o le soifua maloloina ae lei malolo aloaia Bloomfield ile aso 29 o le masina o Iulai.
