Ua faamautu mai e le afioga i le Tamaitai Palemia le afioga Fiame Naomi Mataafa i se avanoa na fesiligia ai i le faai’uga o le vaiaso na te’a nei, e toe faia teuteuga i le Tulafono fou o Fanua ma Suafa 2020, ae afai ae teuteu atu ai ma suiga o le tulafono faavae, na pasia i le Palemene ia Tesema o le tausaga 2020 na avanoa ai ona saofia le tulafono fou o Fanua ma Suafa lea ua faataoto mai ai le tuu mavaevae o pulega o le faamasinoga maualuga ma lea faamasinoga, ona saili lea o le lua vae tolu o nofoa o le Palemene.
O le aso 18 o Oketopa ua faatulaga e toe tauaofia ai le Fono Aoao Faitulafono, ma e lē o iloa i le taimi nei pe faataatia ai i le tauaofiaga lea ma ni teuteuga fou o le a faaofi i lea tulafono e pei ona to’a ai nei galuega a le faamasinoga o fanua ma suafa, ma tuai ai ona fofogaina mataupu ua faato’ai iai, a’o faatino ai i le taimi nei na o su’esu’ega o mataupu i talosaga apili o loo faaaogā ai ni vaega o le tulafono tuai o le tausaga e 1981 lea na soloia atoa ina ua pasia le tulafono fou o fanua ma suafa lea ua faataatia mo se taimi lē tumau lona faaaogāina, seia mae’a mai le soalaupulega a le Palemene.
O le fautuaga a le Komisi su’esu’e o le Palemene na latou tagofia i se sailiiliga ni faaletonu i le tulafono fou o fanua ma suafa, ia ave tagata na faia suiga i le tulafono i se su’esu’ega a le Loia Sili ma le Matagaluega o Leoleo. Ua faaalia e le tamaitai Palemia o loo ave le faamuamua i le toe faasagatonu o le tulafono ae mulia’i ai i se taimi faatino se galuega i lea tulaga, aemaise o loo lafo lava lea su’esu’ega i le ofisa o le Loia Sili ma le Matagaluega o Leoleo.
Le afioga i le tamaitai Palemia, afioga Fiame Naomi Mataafa.
