O le saga faamalosia o taumafaiga o le atinae o le atunuu ma faaauau le tulaga maua pea o galuega e faagaioia ai le tamaoaiga e pei o oloa gaosi, e ese mai taumafaiga tau faatoaga ma atinae o faiga faiva, ua maea fausia ai nei se faiga faavae mo auaunaga e faasino i oloa gaosi i totonu lava o le atunuu.

O se faiga faavae ua tuu faatasia ise tusi ma ua maea ona faalauiloa e pei ona iai faatasi ma se taiala e lima taitaiina ai ia faiga faavae. O se tasi lea o galuega sa galulue faatasi ai le Matagauega o Pisinisi, Alamanuia ma Leipa ma le vaega o Pisinisi Tumaoti le private sector, lea o loo lotolotoi i galuega tau oloa gaosi o loo faatau atu i le atunuu ma maketi i fafo.

O le tausaga e 2016 e pei ona faailoa e le Matagaluega o Pisinisi, Alamanuia ma leipa na a’e ai se fuafuaga e faatino se sa’ili’iliga poo se survey e tuu faatasia ai se faiga faavae mo auaunaga tau oloa gaosi aua o se tasi lea o itu taua tele i fefaatauaiga.

O le malo o Niusila na tuu mai lana lagolago e fausia ai se faiga faavae e pei ona ua maea ma ua faalauiloa aloaia. O le sailiiliga na faatino i totonu o le sefulu tausaga ua mafai ai ona faataoto ia faiga faavae poo policies o le a limata’ita’iina ini ta’iala e faatonutonu lelei ai auaunaga tumaoti i Samoa o loo atinaeina oloa gaosi.