Ua faamautu nisi o fesoasoani a le Malo o Saia mo Samoa e pei ona faalauiloa ia fesoasoani i le mae’a o talanoaga ma feiloa’iga a le Minisita o le Va i Fafo o lea Malo na afea Samoa i le faaiuga o le vaiaso, ma le ta’ita’i o le Malo i le afioga i le tamaitai Palemia.

Ua faamautu le fesoasoani a lea Malo ua fausia ai le nofoaga tutotonu o le faaaliga o tu ma aganuu a Samoa ma o le fale mata’aga fou ua i Malifa. O le fesoasoani o le a fausia ai le Kolisi mo a’oa’oga tau i le tomai faaleoleo le Police academy ma le nofoaga mo su’esu’ega a leoleo i tulagalima poo se fingerprint laboratory.

O lea foi ua faamautu ma le galulue faatasi o Malo e lua e ala i se maliega i ni atina’e faaauau mo le manuia o le atunuu. E lei faatagaina le autusitala ma le aufaasalalau ona faia ni fesili i le Minisita ma le ta’ita’i o le Malo ae ua na o le avanoa e pu’e ai ata o le aumalaga ma ta’ita’i o le Malo o Samoa.

√Sa iai le talosaga na tuuina atu i le Ofisa Sili o Pulega o le Matagaluega a le Palemia ma le Kapeneta mo se avanoa i le tamaitai Palemia o ia foi o le Minisita o le Va i Fafo peitai e lei toe maua mai se faaaliga i le talosaga, talu mai le Aso Toonai na faia ai ia feiloa’iga faavaomalo. Ua na o le pepa o faasalalauga faalauaitele na tuuina mai e tusa o ia feiloa’iga.