O se tala fiafia, o se tala faagaeetia i le faalauiloa ai e le alii logologoā i le lalolagi i le WWE ma ata tifaga, le alo o Samoa, Seiuli Dwayne “The Rock” Johnson le avea ai o si ona tua’ā tina (grandmother) o Ofelia Fuataga Maivia ma se tasi iloga ua faamauina lona suafa i le WWE Hall of Fame 2024.  

O Ofelia, o se tasi lea o uluai tamaitai i le talafaasolopito na mua i malae i le faatautaiga o galuega i le faalauiloaina (promoter) o le taaloga o le tauiviga poo le piiga e iloa uma ai e le toatele le WWE.  

I le talaaga o lea tina, o ia o le faletua o le alii pii iloga a Samoa ia Fanene Peter Maivia, ma o sē na iloga lona tulai mai i le tele o tausaga i le tauaveina ma le faafoeina o le kamupani a Faanānā, e pei ona iai lona tuufaatasia o se tasi o taaloga tele i le talafaasolopito i Hawaii le Polynesian Pacific Pro Wrestling ua faaigoaina o le “Hot Summer Night”.

I lea taaloga na mafai ai ona ia aumaia faatasi le tele o sui iloga o le taaloga e auai ma tuufaatasia ai se faatinoga mata’ina i laufanua o Hawaii.   

I lea lava faatasiga, na faamauina o se tasi o taaloga na aupito i maualuga le numera o tagata na auai e matamata, ae lē gata i lea o se tasi o taaloga na aupito i maualuga le tupe na maua mai ai i le taimi o amata ona vevela le sau o lea taaloga i le tausaga e 1980.  

E ui i le tele o tala i manuia ma taumafaiga o lea tina, ae sa iai foi nisi o faafitauli na fetaia’i ma Ofelia ina ua molia e le malo i le ave faamalosi o tupe o le taaloga peitai e lei faamaonia ia moliaga.  

O Ofelia Fuataga Maivia, o le tua’ā o le tina o Dwayne “The Rock” Johnson le tamaitai ia Ata Maivia Johnson.