Ua faamaonia mai e le Matagaluega o le Soifua Maloloina le o’o atu o le numera o i latou ua aafia i le Koviti-19 talu ona pepesi le faama’i i tua i le lautele o le atunuu i le Aso 17 o Mati i le to’a 2,443, o lona uiga e to’a 164 i latou fou ua aafia mai le mamalu o le atunuu i totonu o le 24 itula talu ai.

I lea fainumera ua fa’amauina mai foi, e to’a 1,541 o loo a’afia pea i le siama i le taimi nei ma e to’a 927 i latou sa a’afia ua fa’amaonia mai ua toe fa’afoisia le malosi ma ua toe maloloina.

Talu mai le Aso 17 o Mati 2022, mai le to’a 2443 na faamauina ua aafia o loo tumau pea le toatele o i latou mai Upolu lea e oo atu i le to’a 2386, to’a 57 le motu tele i Salafai ae o loo saogalemu pea Manono Tai ma Apolima Tai.

Ua fa’amauina mai e le Matagaluega o le Soifua Maloloina e 23,419 su’ega (RAT TESTS) ua faia mo le mamalu o le atunu’u talu ona pepesi i tua le fa’ama’i. E to’a sefulu ma le lua i latou ua a’afia i le fa’amai o loo i nofoaga fa’anofoesea i le Falema’i i Moto’otua mo le taimi nei.

Ua fa’amaonia mai fo’i e to’a tasi ua fa’aopoopo ua maliliu ona o le KOVITI-19 i totonu o le 24 itula ma ua si’itia ai le numera oi latou ua māliliu ona o le KOVITI-19 i le to’alua.