O se tasi o molimau i le mataupu o gasegase a malo o le Itumalo o Falealii No.2 lea na taua i le faamasinoga maualuga o le sui tauva lea na ave le tagi le afioga ia Veletaloola Fuimaono Avauli faasaga na ia tuuina atu se tino i tupe ia te ia ina ia palota ai i le isi sui tauva.
O le susuga ia Fuimaono Ualesi Pe’a o Salani Falealili lea na molimau i le mataupu o le tagi o faiga palota lea na faia e Veletaloola faasaga ia Fuimaono Samuelu Te’o.
Taua e Fuimaono Ualesi na tuu atu e Veletaloola ni seleni i sui e toalima o lona aiga e aofia ai ma ia i le Aso tofi ae Aso Faraile ai le faigapalota.
Na ia taua e masalomia na agai atu Veletaloola i lona fale i Salani ma faapea atu ia te ia ma lona toalua e mafai ona la palota i le sui o le HRPP ae o lana fanau e tolaua e lagolago atu Veletlaoola i le taimi o le palota.
I lea molimau a Fuimaono Ualesi na fesiligia ai e le faamasinoga e faapea “e lei faalogo muamua i se sui tauva ua totogi se tagata ina ia lagolago le isi sui tauva”.
Tali Ualesi e au i le manatu o le faamasino ma o le talitonuga foi lena o le sui o loo tagi.
Faaleo foi e Vui Clarence Nelson le lē ogatusa o le faamatalaga a Ualesi ma molimau o loo i luma o le faamasinoga.
Tali Ualesi “e mafua mai o lana loia”.
Ina ua fesiligia e Vui pe aisea na lē faailoa ai lea matuapu i lana loia.
Ae na taua e Ualesi “o le loia na faia lea faamatalaga (affidavit) e le’o le loia na tuuina atu ia te ai lana faamatalaga”.
Na tetee foi e le molimau ni faamatalaga o le totogi tupe na faia e le sui filifilia ma ia faapea o le mafuaaga na oo ai i le maota o le faipule i le masina o Mati ona o mataupu tau faalavelave a aiga.
O le loia ia Magele Leone Mailo Sua lea o loo tulai mo le faipule filiiflia le afioga Fuimaono Samuelu Te’o.
