Ua faamaonia mai e se sooupu a le Palemia i le asō e moni o loo maua e le Palemia le alauni e 52 afe e saunia e le au totogi lafoga mo lona fale i Ueligitone ae o loo avanoa le Premier House.
Fai mai le televise tasi o lea vaega tupe o se peimeni faaletausaga e faaopoopo atu i le totogi o le Palemia e 471 afe mo lona tofiga o iai nei.
O le Premier House o le nofoaga aloaia lea o le Palemia o Niu Sila peitai mo sina taimi o loo iai i se tulaga ua manaomia le faia iai o se galuega.
Fai mai le sooupu o loo ogatasi gaioiga a le Palemia i le mataupu lea ma aiaiga o le tulafono.
Ua ta’ua i le lipoti o Luxon le uluai Palemia i totonu o le 34 tausaga ua mafai ona ia maua lea peimeni auā o isi Palemia muamua sa aumau lava i le Premier House a o iai i Ueligitone.
