Ua faamaonia e le Faamasinoga Maualuga a Fiti moliaga o Bainimarama, o lē sa avea ma Palemia o le Malo o Fiti i lana paeaiga talu ai, faapea le alii sa avea ma Komesina o Leoleo ae o loo faamalolo lē tumau i le taimi nei o Sitiveni Qiliho.
Ta’ua e le ofisa o loia a le malo, o moliaga o i laua nei e aofia ai le moliaga o Bainimarama o le taumafai e faasese le faamasinoga amiotonu (pervert the course of justice), a o Sitiveni Qiliho o moliaga o le faaaogā sese o ona tofiga (abuse of office).
O le tausaga talu ai i le aso 12 Oketopa 2023, na tuuina mai ai le faaiuga a le faamasino, Resident Magistrate Seini Paumau i le Faamasinoga Maulalo le Suva Magistrates Court, e lē faamaonia moliaga o Bainimarama ma Qiliho ma faaleaogaina ai moliaga o i laua nei.
Peitai e valu ni mafuaaga na toe faila ai e le Setete le apili i le faaiuga a le Faamasinoga Maualalo aemaise lava sa faaautu atu i le manatu sa sese le afioga i le Faamasino i le tulafono i le tele o mau sa folasia e fai ma faamaoniga faapea foi i le faagasologa o le iloiloga o moliaga, ma ua iu ai i le lē fetaui pe lei amiotonu ai le faaiuga na tuuina mai.
O lenei apili na tuuina atu loa i le Faamasinoga Maualuga a Fiti, ma toe iloilo ai pe na atoatoa le amiotonu o le faagasologa ma le faaiuga na tuuina mai, ma aumai ai le faaiuga a lē sa faatinoina tiute o le Faamasino Sili, Justice Temo ua toe liliu le faaiuga ma ua faamaonia ai nei moliaga o lē sa avea ma Palemia talu ai o Fiti, le susuga Frank Bainimarama faapea lē sa avea ma Komesina o Leoleo, le susuga Sitiveni Qiliho.
O le aso 28 o Mati lea ua faatulaga e lauina ai le faasalaga o i laua nei.
