E tolu moliaga o le faatamala ma le lē faia o ona tiute i se tulaga mataalia ua faamaonia faasaga i lē sa avea ma faauluuluga poo le Kapeteni o le vaa leoleo o le Nafanua. 

O le faaiuga o le vaiaso na te’a nei na lau ai le faaiuga a le faamasinoga faaleoleo poo le police Tribunal ma faamaonia ai ia moliaga ae lē faamaonia isi moliaga e tolu. 

Ua faailoa e le tamaitai loia ia Muriel Lu’i sa tulai mo lē na tuuaia le susuga ia Taito Sefo Faafoi Hunt e le’i maua atu se faaiuga tusitusia e iloa ai pe faaulu se talosaga e toe apili ai lea faaiuga. 

O moliaga o lē sa Kapeteni o le Nafanua ma faauluulu iai galuega o puipuiga o le ogasami faatulafonoina o le atunuu e mafua i le faaletonu na pa’ulia ai le vaa leoleo ina ua oso i luga o se pito a’au lata i le ava e ofi atu ai vaa i le uafu i Salelologa. 

O le faatonuina e lē sa avea ma Komesina o Leoleo ua faamavae ia Fuiavailiili Egon Keil o le faaaoga o le Nafanua e la’u ai se vaega o leoleo e fesoasoani i leoleo i Savaii mo le puipuia o le filemu a’o malaga le vaega faaupufai a le HRPP i Savaii e faatino ai lana solo a taavale e faalauiloa ai lo latou tetee atu i le faamasinoga ma tulai mai ai ma le faaletonu i le vaa leoleo. 

O loo iai nei i Ausetalia le Nafanua mo le toe faaleleia ae $3 miliona tala le tau o le vaa leoleo o se tasi o fesoasoani maua fua e Samoa i le polokalame o le puipuiga a le Mālō o Ausetalia ma Niu Sila mo atunuu o le Pasefika. O le autu o le feasoasoani o le leoina lea o ogasami o atunuu mai faiga solitulafono e pei o le feaveaina o pauta ma fualaau faasaina ma le vaavaai o vaa fagota o isi atunuu latou te fagotaina ogasami i ni auala solitulafono.

Ua lau le faaiuga o lae faamasinoga faaleoleo ma faamaonia ai moliaga e tolu o lē sa avea ma Kapeteni ae o loo faatali nei i se togisala.