O le aso 15 o le masina fou o Setema ua faatulaga e tuuina atu ai folasaga ma finauga faaiu a loia mo le itu a leoleo, ma le loia mo le tamaitai o Tuifaasisina Perkin Sauvao, mo le faia o se faaiuga a le faamasinoga ile moliaga e tasi ua faamaonia o le faia o tala ma upu tau faifai poo le insulting words.
O moliaga e 17 a leoleo o le faia e Tuifaasisina oni gaoioiga faasoesa ini ata ma video na ia faasalalau i fesootaiga televavave le social media, ua le faamaonia. Peitai ua faailoa e le faamasino le afioga Alalatoa Rosella Papalii ile lauina o lana faaiuga i moliaga, e iai le malosiaga faaletulafono o le faamasinoga e mafai ai ona faia se fua maualalo e faamaonia ai ia moliaga e 17 ile moliaga o le faia oni tala ma ni upu tau faifai. Ua ave ai le manao o le faamasino i loia a itu auai e tuuina atu ni finauga faaletulafono e fuafua ai se faaiuga o lea tulaga peafai e faaaoga lea malosiaga faaletulafono o le faamasinoga.
O le tasi o vaega sa iloilo iai se faaiuga a le faamasinoga, o le finauga a le ua molia ma lana loia, e leo ia e ana video ma ata faapea faamatalaga sa faasalalau i luga o le fesootaiga o le api o foliga, lea na mafua ai suesuega a leoleo ma taunuu e faia moliaga. I mau sa tuuina atu e le itu a leoleo ua faamalieina ai le faamasinoga, o ia ata ma video faapea faamatalaga na faasalalau ile itulau a Salote poo Perkin Sauvao i luga o le api o foliga le facebook, o le ua molia sa ia faagaioia lea fesootaiga.
Ua atoa nei le tausaga poo le 12 masina talu ona taofia i Samoa le ua molia e leo toe foi i Amerika o loo nofomau ai, ona o taualumaga o lona faamasinoga lea ua aumai le faaiuga, ae ua talia nei se faasalaga ile aso 15 o Setema.
O le tamaitai loia o loo galue tutoatasi o Leinafo Taimalelagi Strickland sa finauina moliaga a leoleo, ae o le alii loia le susuga Faimalomatumua Mathew Lemisio sa finauina le tete’e a le ua molia faasaga i moliaga.
