Ua faamaonia mai le tumau ai o le tofi faipule filifilia o le afioga ia Papalii Li’o Taeu Masepa’u o le FAST mo Faasaleleaga No.3 ina ua ave i tua le tagi o faatosina o le palota a le afioga ia Namulauulu Papalii Sami Leota o le HRPP i le taeao nei.
O lenei mataupu na amata mai i le aso ananafi lona iloiloina. Na auai atu ai ni sui o le itumalo ma fai ai ni felafolafoaiga ma a’e ai loa se manatu i le afioga i le faamasino e taatia le mataupu ae agai sui nei e lua e soalaupule i tua.
O lea la ua manino le mata o le vai ina ua faamaonia mai e Namulauulu Papalii le ave ai tua o lana tagi ma tuu atu faamanuiaga i le afioga ia Papalii Li’o e tauave ai le tofi o le itumalo Faasaleleaga No.3 mo le isi 5 tausaga.
Taua e Papalii Li’o i fafo ane o le potu faamasino “O mea a ia e ta’u o uso fealofani e faafetaia ai Namulauulu Papalii lea ua aumai le fa’aeaea o le tofi ia te a’u, e momoli ai foi le faafetai i si o matou itumalo mo le tapuaiga”.
O le afioga ia Papalii Li’o Taeu Masepa’u lea na filiiflia e le FAST e avea ma Fofoga Fetalai ina ua maea le latou faatautoga i lalo o le faleie i le Aso 24 o Me 2021.
