I le feiloaiga a tusitala ma le Komesina o Leoleo ma Falepuipui ma le ola Toe Fuataina na faamaonia ai e le susuga Auapaau Logoitino Filipo le maliu ai o se tasi o alii pagota i le po anapo.
Saunoa Auapaau o lenei alii pagota sa galue i le vaega o i latou e galulue i le totoina o fualaau’aina mo le fofoga taumafa o pagota ma o loo masalomia na pule le alii pagota i lona soifua e faaaoga ai se vailaau fagavao.
E le o mautinoa le igoa tonu o le vailaau peitai na saunoa Auapaau na auina atu faanatinati i le falemai i Leulumoega o loo ola pea, ma fai ai nisi o togafitiga peitai na faailoa e fomai ua leai se isi gaioiga e mafai ona faatino ai ma o le po anapo lea na maliu ai lava.
Na faailoa e Auapaau i lea feiloaiga e le o mafai ona faailoa faalauaitele le suafa o le alii pagota ua maliu i le taimi nei ma o loo faagasolo pea suesuega o lenei mataupu.
