O si teineititi e nao le 9 tausaga le matua lea na maua lona tino maliu I totonu o se paelo tulou e lata ise vaitafe I Niu Sau Uelese nei, ua faailoa mai ise lipoti lata mai o lea faalavelave e faapea na fana e le tagata ma maliu ai.
O Charlise Mutten na maua atu I auvai o le Colo River ile aso Lua o le vaiaso talu ai ile maea ai oni nai aso sa tau sailia mai ai mai le Blue Mountains. Lipotia e le taitai leoleo o Danny Doherty le mafuaaga o lona maliu ma taua ai ua faailoa lea tulaga ona o suesuega o loo faagasolo aemaise foi ina ia faamalamalama ai lea vaega o le faalavelave na tulai mai .
Faailoa I lipoti o suesuega faagasolo o loo fetauaina ai na tupu le faalavelave na maliu ai Charlise I Mount Wilson lea na mulimuli vaaia ai o ia. O le paaga ale tina o Charlise o Justin Stein 31tausaga ua molia nei ile fasioti tagata.
O le a taofia pea I le falepuipui seia toe valaauina le mataupu ile faamasinoga ile aso 18 o Mati i Penrith. E foliga e lei iai lona tina ile fale ile taimi na tupu ai le faalavelave pei ona faailoa ile lipoti. O loo faia pea suesuega a leoleo ile taimi nei.
