Ua faamanino lelei mai e le taitaifono o le Pacific Island Forum ma o le Palemia foi lea o le Atu Kuki o Mark Brown, le folasaga na faia e le Palemia o Initia o Narendra Modi i le fonotaga lea sa faia i Papua Niu Kini talu ai nei.
Na ta’ua faapea o le a fesoasoani Initia i le silia ma le 12 o atumotu o le Pasefika ma o le paketi lea e aofia ai le fausia ma le faagaioia o se falema’i faapitoa mo gasegase o le fatu o le a fausia lea i Fiti mo le itulagi atoa.
Ua faailoa foi o le a maua uma e atumotu o le a tuuina iai lea fesoasoani se dialysis clinic, fesoasoani mo le suavai mamā, se taavale a le falema’i i luga o le sami, sea ambulance ma fesoasooani i solar projects ma ua faafetaia uma e taitai na auai i le fonotaga lea fesoasoani mai le atunuu o Initia.
E ese mai lea vaega ua lipotia foi o le a tuuina mai ni avanoa sikolasipi i le auaunaga tau komepiuta poo le IT ma o le a faatupe lava e le faigamalo a Initia lea fuafuaga.
O le fonotaga na faia ai lea folasaga e le Palemia o Initia o le Forum for India-Pacific Island Cooperation Summit (FIPIC).
E aofia ai atumotu e pei o le Atu Kuki, Fiti, Kiribati, Marshall Islands, Micronesia, Nauru, Niue, le Atu Solomona, Papua Niu Kini, Tonga, Tuvalu, Vanuatu ma Samoa ma na muai faavaeina lea fonotaga i le 2014.
