I le faagasologa o le faatalanoaina o lipoti a matagaluega taitasi a le malo, sa fesiligia ai e le taitai o le Itu Agai o Tuilaepa Sailele Malielegaoi poo aofia i totonu o lipoti le 400 eka i Togitogiga Falealili lea ua faamatuu atu ia Amerika Samoa e le malo e faatino ai a latou atinae.

Peitai, na tali manino le tamaitai Palemia o Fiame Naomi Mataafa e leai sona silafia i le mataupu o loo ua fesiligia e Tuilaepa.

O le mataupu i fanua i Togitogia na afua ona aliae mai ina ua faatalanoa e le fonotaga a le Senate i Amerika Samoa i le vaiaso na tea nei.

Ma e tele finagalo o le Senate sa lagalagā i lea mataupu, e aofia ai le fesiligia o le Faatonusili o le Ofisa o Faatoaga a Amerika Samoa i tulaga tau maliega, o fuafuaga mo lea atinae aemaise poo ai o faatupeina.

Na toe saunoa le tamaitai Palemia i lea tulaga ma ia faapea mai ai, ai o ni faamatalaga lēmoni na faalogologo iai le taitai o le Itu Agai e faatatau i le 400 eka o loo ia fesiligia.

Faamautu mai e le tamaitai Palemia, e na o le pau lava fanua ua faamatuu mo Amerika Samoa i tulaga tau faafesuiai o loo iai i Moataa ma o loo iai se fuafuaga mo se faaopoopoga ina ia maua se avanoa e latalata i le uafu i Amerika Samoa e tu ai se fale teuoloa e fesoasoani i le femalagaiga a le vaa i le va o motu e lua.

Peitai na toe tulai le taitai o le Itu Agai ma faamanino e lē o ni tala pepelo, ae o felafolafoaiga a le Senate a Amerika Samoa e faatatau i le mataupu na afua ai ona ia fesiligia.

Faailoa e le Faatonusili o Faatoaga a Amerika Samoa, e 11 manu papalagi o loo ua iai i lea fanua, e 5 na faameaalofa atu o le faaoso a le Atoa o Samoa ma le 5 na faameaalofa atu e le Sui Palemia faatasi ai ma mamoe.