Ua faamalamalama e le Minisita a le Ofisa o Tiute ma Tupe Maua o le Sui Palemia foi lea le afioga Tuala Tevaga Iosefo Ponifasio le tele o nisi o fesili a sui faipule i le manaomia ai lea o se masini faaata e suesue ai oloa poo containers mai fafo lea e matuā iloilo ai oloa o loo faaulufale i le atunuu ma saili ai faiga solitulafono i le avatu faananā o fualaau faasaina aemaise o auupega malolosi e le faatagaina i le atunuu 

O le afua o le manaomiaga o lea masini faata ona o loo molimauina pea le faatuputupulaia o pauta faasaina ua maua i le atunuu ma ua fesiligia ai foi tulaga saogalemu o puipuiga o tuaoi o Samoa o le sao atu pea o fualaaus faasaina ma auupega e le faatagaina. 

Taua e Tuala “O tomai faapitoa o lenei masini e faailoa ai oloa o loo i totonu o pusaoloa poo containers poo se pusa faamomoli foi e aunoa ma le tatalaina o se pusa o lona uiga e ati le Vaai a lenei masini e iloa ai oloa faasaina e iai fualaau ma vailaau, auupega malolosi ma nisi foi o oloa e aumai faananā poo oloa foi o loo aumaia faasolitulafono”.

Taua foi e Tuala “O le masini faaata e pei ona o’u faiatu e ati le Vaai i le uamea e 30mm lona mafiafia, e mafai foi e le masini ona maitau lanu eseese ma faailoga eseese mai le tagata lea o loo vaaia le masini o le lanu lea o le lanu o le pauta, o le lanu lea o le lanu o le laulaau e faapena le capability poo le agavaa o lenei masini. O lona uiga e leai seisi e mafai ona toe faananaina se mea o le a manino i le vaai a le masini aemaise foi o le tagata lea o loo vaaia le masini e leai se lea e toe lilo”.