O se tasi o mataupu taua na faamalamalama e le tamaitai Palemia i le polokalame ma le Radio Samoa i le taeao nei o le tulaga lea i le tala faatatau o le tupe a Samoa. Taua e Fiame ina ua o latou pale mai e avea ma malo fou a le atunuu o le vaega muamua lea na tagatagai ai ona ua pasi le taimi sa tatau ona talanoa ma pasia ai le tala o le tupe.
“I le mea muamua a i le galuega faalepalemene o le tulaga lea na naunau ai ina ia usuia le fono e pasia ai le tala o le tupe fou e amata lea i le Aso 1 o Iulai. O lea la ua matou pale mai na matou fia malamalama poo le a le auala na faaoga e le malo tausi e faagaioi ai tupe lea la ua matou malamalama o le faagaioiga o tupe i le taimi nei o loo fai i lalo o le faavae mo faalavelave faafuasei”.
Talitonu Fiame e iai foi a ala o mea faapena ma e ese foi le tulaga na tagatagai iai le FAST i le faagaioiga o tupe a le malo i lalo o le aiaiga 95 o le faavae.
“O le aiaiga lona 105 o le faavae lea na faaoga e le Malo Tausi ae o le aiaiga lona 95 lea na matou tagatagai ai matou, o lea aiaiga e mafai ai ona faaoga le 25% o le tauaofai o le tala o le tupe ua tuanai e fai ma se transitional provision ae o loo tapena se tala autu”.
O le fesili la a le malo fou na tuuina atu pe aisea na le faaogaina ai le aiaiga 95? i le faamalamalamaga a Fiame na faapea mai le Malo Tausi i le latou faaliliuina o le Tulafono o le aiaiga 95 faatoa mafai ona faaoga pe a faapea ua taatia se tala o le tupe i luga o le laulau fono.
Taua e Fiame o le mea moni e iai le feseeseaiga i o latou manatu faaletulafono ma ina ia mautinoa e le muta le faagaioiga o tupe mo le atinaega o le malo lea na a’e ai se manatu i le malo fou e faaauau pea aiaiga na faia e le Malo Tausi e ala lea i lalo o le vaega o faalavelave faafuasei ae tagatagai i latou mo le masina o Setema ia oo atu ai ua iai se tala autu o le Tupe 2021 – 2022.
