A’o i luma ai nei o le Faamasinoga Sili le talosaga a le Peresetene o Faamasinoga o Fanua ma Suafa ia Fepuleai Atilla Ropati ua finau ai o loo iai malosiaga o le tulafono a le LTC ua pasia i le 2020 e aloaia ai le filifilia o le Peresetene, Peresetene Lagolago ma se faamasino fou o lea ua folasia ai le finagalo o le Palemia e faatatau i lea mataupu.

Ua faailoa le manatu o le taitai o le atunuu ma faamanino ai tulaga tonu o le fetusiaiga i le va o le Minisita o Faamasinoga ma le Peresetene o le Faamasinoga o Fanua ma Suafa. 

Faaalia e Fiame Naomia Mataafa o le tulafono na pasia ia Tesema o le tausaga e 2020 ua soloia ma faaleaoga ai tofiga o faamasino uma o lea faamasinoga taua a le atunuu. Ae i lea lava tulafono e le’o iai se aiaiga faaletulafono e filifilia ai ni faamasino ma o le vala tonu lea o loo popo’e ai le Minisita o Faamasinoga le afioga Matamua Vasati Sili Pulufana i le tatau ai ona faatali le filifiliga ua maea ona faia e le Komisi o galuega a le faamasinoga o Fanua ma Suafa i le sailiiliga o loo faia e se Komiti a le Palemene ina ia fa’aofi ai le aiaiga e filifilia ai tulaga tofi o le faamasinoga faasino lea i faamasino. 

Taua e le Palemia “ O le suiga la lena o le tulafono i le 2020 na faapea mai ai ua aveesea tofiga o faamasino na faia i lalo o le tulafono o le 1981. (The appointments of judges made under the 1981 land and titles courts was revoked) O lona uiga ua leo toe iai ni tofiga o faamasino, e le’i iai se aiaiga ua tuu i totonu o le tulafono fou e toe tofia ai ia faamasino. O le auga la lena o le faafitauli lea tulai mai. Ma e iai isi mataupu o loo gafa nei ma le Komiti o le Palemene i tulafono nei ae mo le afioga i le tamaitai Minisita o faamasinoga ma lana galuega e faigata tele ona faatino lana galuega ao lea o loo taatia le tulafono fou lea faimai ua faaleaogaina tofiga o faamasino na tofia i lalo o le tulafono 1981 ae leo iai se aiaiga e toe fa’aauau ia faamasino o loo iai nei.” 

Na ia taua foi “ O le auga lena o le mataupu o le agaga a le Tamaitai Minisita ma le Mālō matou te taumafai e puipui le faamasinoga ma i latou o loo galulue i le faamasinoga e tauala i le tofi faamasino. O le agaga la o le Minisita sei faapafala teisi ona o tulafono o le matafaioi lea a le Palemene e na’o le Palemene foi e mafai ona faia ni teuteuga i le tulafono i le mea lea ua iloa nei, ma e le’o iai se agaga o le Mālō lenei, auā ana faapea e moni lea mau ua taofia e le Minisita auaunaga mo le faamasinoga lea o lona uiga ua leva ona fai i faamasino e o loa i o latou aiga ae atonu e iai nisi o galuega e mafai ona faaauau ai ae na’o le pau a pe talosaga a le Minisita tatou onosai ave le avanoa i le Palemene sei fai le latou matafaioi aua e lē mafai ona sui e le Pulega se tulafono, o tulafono e sui e le a Palemene.” 

Ina ua fesiligia e le afioga Galuemalemana Tipi Autagavaia le tamaitai Palemia pe na lape le silasila a ē faia le tulafono i lea vaega ae tali le tamaitai Palemia “Sa’o lelei, o le tulafono a 2020 o lae aumai ai le faaupuga o tofiga na fai i lalo o le tulafono 1981 ua faaleaogaina i totonu o le tulafono fou lea, oute leiloa la poo le lape ua paū le tuuga o aiaiga ii poo le mea sa iai se famoemoe e ese se isi tulafono e fai, o le mea la lena e le’o manino lelei le tulaga lena”.

O le vaiaso fou e tagofia ai e le faamasinoga le talosaga a le Peresetene o le Faamasinoga o Fanua ma Suafa.