O le asō le aso faapitoa i le lalolagi mo le soifua maloloina o oloa poo nifo, World Oral Health Day ma ua unaia ai e le asosi fa’inifo a Niu Sila NZ Dental Association NZDA le malo ina ia faataatia ese loa vaiinu suamalie mai totonu o aoga ona o aafiaga i oloa, faateteleina o le tino puta ma le mamafa o le tino.
I luga o le polokalame o le Breakfast na ta’ua ai e le peresetene o le NZDA, Dr Amanda Johnston o le inumia o vaiinu suamalie o le mafuaaga numera tasi lea o le faatama’ia o nifo poo oloa aemaise o le faatupulaia ai o le tino puta.
Faailoa i le RNZ e silia ma le 1/3 o tamaiti i le atunuu ua ova le tino puta ma o le aafia o nifo poo oloa o se tasi mafuaaga taatele lea o le taofia o nisi tamaiti i le falemai ma ua tatau lava ona faia ni suiga.
Faailoa e fomai o se gaioiga faigofie lea e mafai ona faatino e le malo e puipuia mai ai fanau, o le tapu lea o vaiinu suamalie mai aoga uma intermediate ma aoga maualuluga ma ia faamalosia se faiga ia na o le vai e mafai ona inumia i aoga.
Fai mai le asosi o fa’inifo o le faia o lea tulaga o se tasi lea o gaioiga aupito sili ona lelei ma taugofie ai le soifuaga ma faaitiitia ai le mama’i ma o se gaioiga lelei tele lea pe a faatino loa e le malo.
