Search

Faamanatu le 70 tausaga talu ona faavae le Kolisi o Samoa

O le vaiaso atoa lenei o le a faagasolo ai polokalame o le faamanatuina o le atoaga o le 70 tausaga talu ona faavae le Kolisi o Samoa, o se tasi o kolisi a le Malo sa amata ona faafailele ai le ola aoaoina o ni taitai o le atunuu mo le lumanai.

O le asō, Aso Gafua le amataga o lenei vaiaso fou, na alu ai le savali i lumāmaota o le Malo ma faia ai se sauniga lotu ma le saunoaga mai le Malo e tatala aloaia ai polokalame o le 70 tausaga.

Na taitaia le sauniga lotu e le susuga i le faafeagaiga, Rev Professor Mosese Mailo, o le Pule o le Kolisi Faafaifeau i Piula, sosoo ai le saunoaga a le SCOPA na saunia e le Afioga Tapusatele Tuiletufuga Ropati Mualia, le Afioga i le Sui o le Fono a Sui Tofia, ae saunoa le Afioga i le Sui Palemia, Hon. Tuala Tevaga Iosefo Ponifasio e momoli le faamanuiaga a le Malo mo le faamoemoe o le SCOPA.

Sa tauaaoina atu ai foi i lea taeao i le sauniga aloaia, le meaalofa tupe e $50,000.00 a le asosi a le SCOPA NZ e lo latou peresetene, le afioga ia Leaupepe Tala’i Lene ma nisi o sui auai o le SCOPA NZ o loo auai atu i Samoa.

E lei avanoa le Afioga i le Masiofo a le Ao Mamalu o le Malo sa faatulaga i le polokalame o ia e alaina le Keke o le aso fanau, o lea na valaaulia ai se tasi o sui faavae o le kolisi mai le tausaga e 1953, le tina ia Naitua Taefu, e na te faaauauina le alaina o le keke.

O nisi o polokalame o le a faasolo i le asō e aofia ai se fiafia i le afiafi ananei e faafeiloai ai tama ma teine sa aooga i le kolisi e pei ona malaga mai nisi mai atunuu i fafo e auai.

O le a sosoo ai taaloga i le Aso Lua, o faatasiga poo reunions a vasega le Aso Lulu, o le taamilosaga taga polo o le 70 tausaga le Aso Tofi ae taualuga i le Aso Faraile i le siva tele o le 70 tausaga ua aulia.

Tala sili ona faitaulia

SAMOA UPDATE

TALA FOU MAI SAMOA

Keep uptodate with Radio Samoa activity & promotion

* indicates required