Na faamaonia mai e le tamaitai Palemia Fiame Naomi Mataafa se la feiloaiga ma le tamaitai Loia Sili Savalenoa Mareva Betham- Annandale ma talanoa ai i mataupu na tuu atu i lana tusi i le Aso 4 o Aukuso.
Taua e Fiame i lana polokalame ma tusitala i le vaiaso nei na ia faamalamalama ai ona o lea ua i luma o le tulafono le mataupu e lē mafai la ona auiliili mai ai sona manatu peitai o lana faamamafa na tuuina mai ina ia malamalama lelei le Loia Sili i lona tiute fai.
“Tau ina o’u faapea atu o lae na te silafia lona tiute o ia lea e puipuia le faamasinoga ini osofaiga ma ni upu e fai iai”.
Faaalia foi e le Palemia o le faamatalaga a le Loia Sili na tuuina atu e faapea o le taimi nei o loo ia aiaia (review) poo le a sa’o a tulaga o mea nei e fua iai lana gaioiga e fai.
Na faaali foi le lagona o le Loia Sili i le tamaitai Palemia e faapea o loo maaleale ma lagalāgā le siosiomaga faaupufai ma e iai sona lagona a gaioi atu o ia i lena tulaga o le a ono toe tulai mai ai ni vevesi.
Peitai o le faamanatu a Fiame o le tiute ma le tofi o le tagata o lea na ave iai le faafesili e ala i le tusi. O le taimi nei o le mataupu ua tuu atu i finauga faaloia ona o loo i luma nei o le faamasinoga.
