O le fonotaga lona 15 a le Matagaluega o le Soifua Maloloina na amatalia i le taeao nei ua auai faatasi ai ona vaega eseese o auaunaga e aoao manogi e faatalanoa ma fetufaai faalesoifua maloloina i galuega ma polokalame sa galulue ai i tausaga taitasi.

O le faamamafa o lenei fonotaga e pei ona saunoa ai le Minisita o le Matagaluega, Afioga Valasi Luapitofanua Tafito Selesele ia unaia suesuega tau le soifua maloloina.

“O loo faamamafa i le autu o lenei fonotaga le unaia o le faatinoina o suesuega tau soifua maloloina ma atinae tomai o le aufaigaluega e faatinoina ai lea matafaioi faatulafonoina e le Matagaluega.

“E fesoasoani ai i le faaleleia o le faasologa o auaunaga i ona vaega autu e 6 e aofia ai taitaiga ma pulega tau le soifua maloloina, aufaigalulega, faatupeina, faafoeina o faamaumauga ma faamatalaga, faafoeina ma le puleaina o oloa tau le soifua maloloina ma tekonolosi faapea ai faatinoga o auaunaga i ona vaega eseese.

“O le fesili e faapefea ona unaia ma siitia le tomai o le aufaigaluega i le faafoeina o suesuega faalesoifua maloloina.

“E mau eseese lava ae peitai o lea ua amata le fausiaina o le taiala e faafoeina suesuega tau le soifua maloloina ma o loo limataitaiina ai galuega a le komiti o suesuega tau le soifua maloloina.

“Ia mautinoa o loo faamalieina vaega uma e ao ona mulimulitaia e i tatou ae le gata i lea ua iai le avanoa e faalauaiteleina ai tomai ma agvaa o le aufaigaluega e tauala mai i paaga tauatiae.” 

O mataupu o le a talanoaina i le fonotaga i le asō o le a faamanino ai nisi o vaega tāua o suesuega tau soifua maloloina ma folasia ai nisi o suesuega ua mae’a faatino. 

“O le ki mo le ausiaina o le taunuuga lelei o nei taumafaiga uma o le unaia lea o faatinoga ma le atinaega o tomai ma gavaa e faatinoina ai suesuega tau soifua maloloina.

“E ala i le galulue faatasi o vaega uma aemaise o le amanaia o le sao o le atunuu lautele i atinae tau soifua maloloina e pei ona iai le autu o lenei vaiaso faapitoa o le soifua maloloina ia taimua nuu ma afioaga.

“Tatou te moomoo tele e fesoasoani i le atinaega ma le faaleleia o auaunaga a le soifua maloloina e aofia ai ma le faatautaia o suesuega ina ia mautinoa o loo moni faamaumauga ma faamatalaga o loo faavae ai le tausia o taiala ma faiga faavae.

“E talitonu le manatu o le a telē sona aogā i le faufauina o a tatou galuega ma polokalame faatino aemaise o la tatou auaunaga e oo i o tatou tagata.”

O nisi o lomiga ua mae’a tapena e le Matagaluega faatasi ai ma le tuu mai o le fesoasoani a paaga e atagia ai suesuega sa faafoeina. 

O nei lomiga e aofia ai fuafuaga autasi a le Matagaluega i tausaga faaletupe 2023/2024 2024/2025, fuafuaga o galuega faatino mo le puleaina o le faaaogāina o fualaau tui 2023/2028, faiga faavae toe iloilo mo le polokalame o gasegase auina atu i fafo mo togafitiga 2023, faiga faavae mo fuafuaga mo le faafoeina o vailaau ma fualaau mo togafitiga i tausaga faaletupe 2023/2024 2027/2028, taiala mo le tafiesea o le kanesa tau tamaitai 2023, taiala mo le faafoeina o tuipuipui masani 2023, taiala mo fesootaiga ma le suia o amioga i le taumafa tapaa 2023, tusi taiala o aoaoga e taofia ai le ulaula tapaa 2023, alafua o le faatinoga auaunaga tau soifua 2023 faatasi ai ma le taiala mo puipuiga mai faamai feaveai e namu 2023/2033.