Faamālōlō lē tumau le leoleo na liki ai le ata o Toeolesulusulu

O le Aso Lulu 2 o Iuni na faamālōlō lē tumau ai se tamaitai Leoleo ina ua iai faamaoniga o lona tuuina mai ai i tua le ata (mugshot) a le sui faipule o le Faatuatua i le Atua Samoa ua Tasi FAST le afioga ia Toeolesulusulu Cedric Schuster.

E pei ona silafia o Toeolesulusulu  na taofia ma molia i le ave taavale onā i le Aso Lua 1 o Iuni.

Faamaonia e le Komesina o leoleo Fuiavailiili Egon Keil i le Samoa Observer na faamalolo le tumau lenei tamaitai leoleo ina ua maua faamaoniaga i ana gaioiga na fai na afua ai ona liki mai i tua le ata o le taofia ai o Toeolesulusulu, ma taua e Fuiavailiili o le a agai loa le Matagaluega e faamuta auaunaga a lea tamaitai.

Na faamanino e Fuiavailiili o le gaioiga na faatino e lea tamaitai leoleo o se faaiuga faapolokiki ma e tatau ona manatua e lē vaai māmā le Matagaluega i ituaiga faiga faapea a soo se tasi lava o le aufaigaluega.

Taua e Fuiavailiili e lē aumaia ni lagona mai o le faaituau i le isi vaega faaupufai e fai ai galuega a le Matagaluega  ma o le ala lea o le faamalolo ai o lea tamaitai.

O le tamaitai leoleo e le’i umi ona iai i totonu o le Matagaluega na faatoa faauu i le amataga o le tausaga nei.

Ua faamavae nei Toeolesulusulu mai le tofiga o le Minisita Filifili o Punaoa Faalenatura ma le Siosiomaga ma na faamaonia ai e Fiame Naomi Mataafa lea tulaga.

LAUILOA

Keep uptodate with Radio Samoa activity & promotion

* indicates required