Ua faamalolo lē tumau ai nei e le Komiti o Asosi o Taaloga Samoa le asosi Triathlon ma o se tulaga faanoanoa lea ia i latou uma o loo taumafaia lenei taaloga i le atunuu.
E pei ona faaalia e se tasi o sui o le asosi Lani Wendt Young, o le tulaga ua iai nei ua faagasolo loa i le isi vaega.
“O lea ua iai la matou Loia ia Taulapapa Brenda Latu e tuuina mai fautuaga pe faapefea ona faatino vaega e moomia mo lenei mataupu.
“Ua mae’a ona tuuina atu foi se tusi i le Minisita o Aoga lea sa ou auai ai foi i se fonotaga ma le Pule Sili a le Matagaluega ia o se fesoasoani tele foi lea mo matou.”
O le tulaga o lenei mataupu a oo atu i le aso 1 o Setema o loo faamalolo lē tumau lenei asosi ona feagai lea o le Komiti o le Asosi o Taaloga a Samoa ma le au triathlon a Samoa lea o loo tapena i le taimi nei mo taaloga a le Pasefika i le masina o Novema o le tausaga nei.
“O le taimi nei o le popolega lava o le autaaalo mai lava i le ‘au tele o loo tapena i aso uma mo faamoemoe ua silafia seia oo lava i nai tagata o loo taumafaia lenei asosi.
“O le faamalolo lē tumau o le asosi e le o se mea na matou manatu e tupu ae peitai afai lava o le manao lea ia e iai lava upu e fai i taimi faapenei, e iai lava taimi e sologa lelei ai mea uma e iai foi taimi ua sou ai.”
O lenei mataupu na alia’e mai ina ua mae’a le fonotaga faaletausaga a le asosi ma tuuina atu ai ona sui fou i le Komiti o le Asosi o Taaloga a Samoa ae peitai na toe tusi mai ai le Peresitene ona o nisi o vaega e ao ina toe talanoaina e le asosi i lona lotoifale.
