I le tuana’i o ni vaiaso talu ona faailoa e le Komesina o leoleo le molia o le faia’oga ulu o le Manu Samoa i ni moliaga se lima e fesoota’iga i ni gaioiga tau faiaiga faasolitulafono, o le faai’uga o le Aso Faraile na te’a nei, na faailoa ai e le Lakapi Samoa le faia o le faai’uga a le Komiti Faatonu e faamālōlō lē tumau le tofiga faia’oga ulu o le Manu Samoa o loo tauaveina e Mase Mahonri Schwalger.
O se faai’uga o le a toe iloilo i le tuana’i o le 3 masina, ae o loo maua pea le totogi o le faia’oga ulu i le taimi nei ua amata ai ona faamālōlō lē tumau.
O le aso 4 o le masina fou o Novema le ulua’i valaauga o moliaga a leoleo i le Faamasinoga Maualuga.
Faaalia e le Lakapi Samoa e tumau pea ona faaaloalo i le faamasinoga ma e lē toe iai se isi faamatalaga faalaua’itele e tuuina mai i lea mataupu ua i lima nei o le tulafono.
