Ua momoli le faamalo a le tamaitai palemia o Niu Sila, Jacinda Ardern i le palemia fou o Peretania, le tamaitai o Liz Truss o le taitai foi o le pati a le Conservative i le UK poo le United Kingdom. 

O le tamaitai o Liz sa avea ma failautusi o le va i fafo a le atunuu a o lei tofia i lona tofiga fou lea ma o le vaiaso nei o le a aloaia ai loa le tofiga lea e le tupu tamaitai o Elisapeta.

Fai mai Ardern ua nofo sauni Niu Sila ma lana faigamalo e galulue faatasi ma Truss ma lana kapeneta i le maliega o fefaatauaiga saoloto aemaise mataupu e pei o le suiga o le tau, le youth mobility scheme faapea foi ma le Pasefika ma le lagolago foi i le malo o Ukraine. 

Ave foi le faamalo a Ardern i le palemia ia Boris Johnson i le taimi foi a o tulai mai i le tofi ma o latou galulue faatasi ai.