I le tauaofiaaga lona lua o le Palemene lona 17 a Samoa i le asō ma saunoa ai le tamaitai Palemia afioga Fiame Naomi Mataafa e faamalamalama auiliili tulaga na tauasa mai ai le faigamalo fou ma ona fuafuaga e oo mai i lenei aso taua.
“Ua sau le vaa na tiu tau mai i le vaa na tau ao loo mamau lago o le vaa na faō afolau, e faapena le uiga o le tatou malaga ma ona auvaa o e tiu, o ē o loo taumalae ma ē ua tapuai mai, ae o auvaa foi e tuu faasolo i matafaioi.”
I lana saunoaga na ia taua ai le tele o vaega na agai ai le Fatuatua i le Atua Samoa ua Tasi talu ona pale mai e taitaia le Mālō mo le isi 5 tausaga. Ua silia ma le 4 masina talu mai le Aso 9 o Aperila na faia ai le filifiliga a le atunuu e ala i le palota mo ni sui o le atunuu e tulai mai e faafoi le faigamalo.
“o le taeao muamua lenei ua ulufale ai sui tofia faatautoina o le fono usu a le atunuu i le maota lenei i Tiafau sa fītā le filifiliga a Samoa na faia Ia Aperila”.
Na ia saunoa foi i le tele o feteenaiga e ala i le faamavae ai o nisi o sui sinia o le malo ae le gata i lea o le faamalolo ai o se tasi na tauaveina le tiute a taua o le Loia Sili ona o le tele o vaega e ua le faatuatuaina ai i le faatinoga o galuega ua tofia ai ma e lē mafai ona faaauau le galulue faatasi ma le faigamalo fou.
Taua foi e Fiame “E tulaga ese lenei paeaiga ma e pine i le vaaiga i lenei taeao ma le tulaga ua lē atoatoa le nofoia o nofoa o itumalo e pei ona sa sau a’i i paeaiga ua mavae”.
Na faamanino foi e le tamaitai Palemia vaega i Pulega taitasi o le Mālō faapea aufaigaluega aemaise o le tafatolu ina Ia mauaa le galulue faa polofesa mo soo se Mālō e tulai mai e taitaia Samoa i lea taimi ma lea taimi.
O le manatu o Fiame “o le nenefu o le aufaigaluega i le eseese o le mea e ta’u o le malo ma le vaega faaupufai aua latou te le’i iloa lava seisi Mālō na’o le faigamalo lava a le HRPP”.
O le faamanatu a le tamaitai Palemia e manaomia e soo se faigamalo se aufaigaluega e lava tapena i soo se taimi, aua o i latou foi o loo iai le tomai ma le agavaa e faatino ai galuega a le malo.
O le talaaga o le FAST o se vaega faaupufai na fofoa mai Salafai i le tausaga talu ai na lesitalaina ia Iulai o le tausaga 2020. E 51 ona sui na tauvaina i le faigapalota tele ia Aperila ma na tulai mai sui e 24, na faaopopo ai i lea fainumera sui tutoatasi e toalua ona maua ai lea o le to’a 26 lea ua faatulai mai ai le faigamalo fou ua iai nei.
