Ua sailia nei se isi atunuu e talimalo i le Ipu o le lalolagi i le Lakapi Liki mo le 2025 ina ua faamaamulu ese le atunuu o Farani lea sa fuafua o latou e talimalo.
Ua lipotia e le Televise Tasi, o Niu Sila ma Ausetalia atunuu ia e ono tulai atu e tali i lea valaau, masalo pe talimalo faatasi foi ma iu ina toe tuu atu ai i tua i le 2026 le faamoemoe.
O Niu Sila ma Ausetalia sa talimalo faatasi foi i le 2017 atoa ai ma isi taaloga e tolu sa faia i Papua Niu Kini ae o le 2008 na talimalo ai na o Ausetalia i lea lava faamoemoe.
O le Ipu o le lalolagi i le 2021 na faatuai foi ma faatoa faataunuu i le 2022 ona o le koviti lea na malo mai ai Farani i tauofoga na faia mo le isi atunuu e talimalo i le 2025.
Peitai la ua iai lipoti ua ta’ua ai nisi o faafitauli tau i le faatupeina o le faamoemoe ina ua faaitiitia le lagolago a le malo o Farani.
I se pepa o faamatalaga mai le International Rugby League (IRL) ua faailoa ai o loo fuafua e tatau ona oo atu ia Iulai ua mafai ona logoina atunuu uma o le taamilosaga e tusa ma ni fetuunaiga o le taaloga.
Fai mai le IRL e faaaloalogia foi le faaiuga ua faia e le malo o Farani i lenei vaitau o le mau luitau o feagai ma le lalolagi e ui i le lagona o le lē fiafia o le toatele i le tulaga ua tulai mai.
O Farani foi lea e talimalo i le tausaga nei i le Ipu o e lalolagi i le lakapi Iuni i le itupa o alii lea e faia mai ia Setema 8-Oketopa 28.
