O se falemaliu i Tauranga ua feagai nei ma se sala tupe e ono oo atu i le 600 afe i le mataupu ua lipotia i le leitio faavaomalo a Niu Sila, o se faaletonu i le masini e faaaogā e faaliuefuefu ai tino maliliu a le atunuu, le cremator na iu ina alu ane ai ma le asu ma lefulefu o tino maliliu i tuaoi o lea nofoaga.
O le Legacy Funeral Homes e pei ona faailoa e le RNZ na valaauina i le faamasinoga o le siosiomaga, environment court i le vaiaso nei auā ua mae’a ona latou ioeina moliaga i lalo o le Resource Management Act ona o lea mataupu.
O le faasalaga la aupito maualuga o lea ituaiga soligatulafono e ono oo atu i le 600 afe.
O le faamatalaga a le faamasino, o le mataupu lea ua ta’ua ai, o le a taofia lana faaiuga mo le taimi nei i lea mataupu se’i toe vaavaai ma le toto’a iai mo ni nai aso ona faailoa mai lea o lana faaiuga.
