Ua faaleaogaina le talosaga na tuuina atu e toe iloilo ai le faaiuga a le Faamasinoga Maualuga lea na tuuina mai i le Aso Gafua 22 Novema, 2021.

Faailoa e le tamaitai faamasino na tulai mo le sui a le Faatuatua i le Atua Samoa ua Tasi ia Fuimaono Sarona Ponifasio o le faaiuga muamua lava a le faamasinoga na tuuina mai i le Aso Gafua o le vaiaso nei o le faaiuga lava lea e lē mafai e se tasi ona toe apili pe toe talosaga e iloilo aemaise lava i mataupu tau faigapalota ona o loo manino le tulafono o le mafuaaga lea ua faaleaogaina ai le talosaga a Tuitogamanaia ina ia toe iloilo lea mataupu.

O lona uiga e leai lava seisi auala e mafai ona toe uia o se avanoa e toe tauva ai lea sui a le vaega faaupufai e Puipuia Aiā Tatau o Tagata le HRPP ma ua faatumauina ai le avea o le sui ole FAST ia Fuiono Tenina Crichton ma sui faipule o Falealupo ae le gata i lea ua avea foi o ia ma sui fou o le Palemene o Samoa.

O le aso a taeao o le a faataunuu ai palota laiti a itumalo e 6 o loo totoe.