E ono vaiaso o se polokalame fesoasoani o loo ua amatalia nei i le Iunivesite i Melepone Ausetalia mo sui mai atunuu o le Pasefika ma nisi mai atunuu Asia o loo auai ai.
O lenei polokalame o loo agai lea i le faalauteleina o tomai i mataupu i suiga o le tau ma le soifua manuia.
I lipoti mai le ofisa o polokalame tau i le siosiomaga a le Pasefika le Secretariat of the Pacific Regional Environmental Programme (S.P.R.E.P.), o le a faafoeina lenei aoaoga e nisi o vaega o suesuega o le tau a Melepone faatasi ai ma le aoga ua ta’ua o le School of Population and Global Health.
E silia ma le $400,000 le faatupeina o lenei polokalame mo sui taitasi o loo auai ma o se galuega fai faatasi a le Iunivesite o Melepone ma le Pacific Climate Change Centre e pei ona faailoa ai e le Faatonu Sili o S.P.R.E.P. Sefanaia Nawadra.
“O lenei polokalame o le a fesoasoani tele lea i atunuu o le Pasefika e ala i ona sui auai i taumafaiga mo le puipuia o le siosiomaga o le Pasefika.
“O le ata fausia o le faagasologa o lenei polokalame sa fuafuaina e le Iunivesite ma le P.C.C.C. ina ia faaaupegaina sui auai i tomai faaopoopo, o alāmanuia ma le galulue faatasi ina ia faatinoina auaunaga i vaega o loo laualuga ai lenei faamoemoe.”
O le mae’a ai o lenei aoaoga, o le a faailoa ai e sui auai faiga faavae e agai lea i le tau poo ni faatinoga e tuuina atu i ē o loo feagai ma le faafoeina o le polokalame.
