O le tusi taiala ua faalauiloa e le Matagaluega o Leoleo i sauaga i le lotoifale o aiga lea o loo iai faatasi ma le faiga faavae o sauaga i totonu o aiga sa faalauiloaina i le masina o Aperila o le tausaga nei.

O lenei tusi taiala e tāua lea i le siitia o le taumafai e tusa ma auaunaga a le Ofisa o Leoleo i le puipuia lea o i latou e aafia i nei sauaga i totonu o aiga ina ia mafai ona taofia ma faatuputeleina pea le filemu i le siosiomaga o ola ai o tatou tagata.

I se pepa o faamatalaga mai le Matagaluega, na faaalia ai e le Minisita ia Faualo Harry Schuster o auaunaga a malu o le Malo i vaega o faatinoga o loo ave iai le faamuamua e tusa ai ma lenei faafitauli.

“O le taiala lenei e faapupula atili ai vaega o loo ave iai le faamuamua a le Matagaluega o Leoleo lea e agai lea i polokalame faaleaoaoga, o faiga faavae, o le oo atu o lenei feau i nuu ma afioaga o suesuega ma sailiiliga o loo faatinoina aemaise o le faasoa lea o manatu ma tali atu e ala i fesoasoani mo i latou o loo aafia i lenei faafitauli.”

Faailoa foi e le Komesina Lagolago, Papalii Efo Moalele e fai lava si tāua o lenei taiala i le tali atu o le ofisa i ana auaunaga.

“O sauaga i totonu o le lotoifale o aiga e eseese lava ma o nisi o nei sauaga e aafia tele ai tina ma tamaitai aemaise fanau, o loo faatupulaia pea ma ua iai nisi ua ma’umau ai le soifua.”

O lenei faamoemoe sa molimauina lea e nisi o Minisita aemaise sui mai Matagaluega a le Malo ma ana paaga.