Ua faalauiloa i le vaiaso nei e le loia sili a le setete o Niu Sa Uelese le pili faata’ita’i o le a vaaia ai le faafalepuipuiina o tagata e iai i ni mafutaga ma faamaonia ni moliaga e aofia ai le pulepuletutū ma e ono oo le umi o ia faasalaga i le fitu tausaga i le falepuipui. 

O le su’esu’ega na faia e se komiti a le Palemene ua iloa ai ua alagatatau ona avea ma solitulafono le tulaga lea i le faaperetania coercive control, o se ituaiga sauaga e aofia ai uiga e teena ai sa’olotoga mo isi ma tulaga tuto’atasi. E aofia ai i ia faiga ni uiga saua, uiga matagā fai faamalosi, sauaga faalemafaufau ma tulaga tau tupe. 

O le taimi nei la o loo saili e le malo ni finagalo faaalia i lea pili fou ma fai mai le loia sili Mark Spearman o se mataupu e lē faigofie ma e ao ona soalaupule ma le toto’a.