Ua avea le fono a faauluuluga o auaunaga tau soifua maloloina a atunuu o le Pasefika o loo talimalo ai Samoa i le vaiaso nei, ma avanoa lelei e faalauiloa ai ma le polokalame a le matagaluega o le soifua maloloina i Samoa mo le puipuia o mata poo fofoga.
O se polokalame ua manatu le Minisita ma le pulega o le soifua maloloina o le a mafai ona maua ai e le atunuu aoaoga ma faamatalaga tāua e faatatau i auala e puipuia lelei ai o latou fofoga, ma lē mafai ai ona aafia i ni gasegase poo nisi mafuaaga e iu ina pō ai le vaai.
E lima tausaga o le polokalame lenei ua faaigoaina o le Samoa National Eye Care, ua galulue faatasi ai le matagaluega o le soifua maloloina ma le faalapotopotoga faavae i Niu Sila e ta’ua o le Fred Hollows Foundation New Zealand.
