O se tasi lenei o Matagaluega o loo tele ina lolofi atu iai le atunuu aemaise lava i le aufaifaatoaga aufailafumanu ma le aufaifaiva i vaega e moomia ai le fesoasoani ia latou atinae.

O le taeao nei na faatino ai le faalauiloa a le Matagaluega i le nofoaga o le maketi i Fugalei i ana auaunaga eseese o loo mafai ona ofoina atu i le atunuu.

Saunoa le Minisita ia Laaulialemalietoa Leuatea Polataivao Fosi Schmidt e tusa ai o lenei faamoemoe.

“O lenei suiga fou a le Matagaluega o le faaopoopoga lea o matafaioi faatino e ala i le alualu pea i luma o galuega a le Matagaluega o le faatuputeleina pea lea o faalauiloa faapenei e faamapue ai finagalo ma manatu ma lagona o le aufaifaatoaga ma le aufaifaiva auā o latou faiva alofilima i le Matagaluega.

“Ua manatu le Matagaluega o lea ua mae’a ona faatulaga a tatou Uluai Seleselega ma talomua o lea ua faasolo atu i nuu i tua.

“O le faamoemoe foi o le Matagaluega ina ia maua fesoasoani mo i latou e pito sili ona manaomia le fesoasoani e ala ia i latou o loo iai faatoaga tau atiae, faatoaga ua faataunuu ma faatoaga ua leva ona faia ma o loo faaauau.”

Na ta’ua e Laauli o le sootaga vavalalata lea na manatu ai le Matagaluega e tatau ona faatino pea le faamoemoe lenei mo le Matagaluega lava ia.

“E taatia pea le tulaga i Uluai Seleselega o le vaega na e fitoitonu i fono faavae ma a latou fuafuaga.

“O loo avanoa le Matagaluega a e manao i ni au faisua, tilapia, limu fuafua ma soo se mea e te moomia alu iai, resitala ma fai tuutuuga uma ina ia avatu mea e faaaoga lelei ae le o le avatu loa tia’i.”

Na faalauiloa ai foi ma nisi o oloa o loo gaosia mai fua o faaeleeleaga.

“O le isi laasaga lea o loo agai iai e taumafai e faamalosia.

“O le tatou Ofisa o Suesuega Faasaienisi e le i lalo ifo o le 20 ituaiga experiment ua uma ona fai o oloa e gaosi mai oloa tau faatoaga.”