O le faasaoina, malupuipuia, apoapo ma faasaoina faasinomaga faaleaganuu o le vaega tāua lea o le galuega a le vaega o Aganuu a le Matagaluega lea na faalauiloa i le vaiaso nei.

Saunoa le Minisita o Aoga ma Aganuu, o Seuula Ioane Tuuau na ia faaalia ai lea galuega o se auala mautu ma mauaa e mautinoa e apoapo, teumalu ma malupuipuia o tatou faasinomaga faaleaganuu; e pei o talatuu ma tala o le vavau, mai le mouese pe leiloa atu. 

Ta’ua e le Minisita na iai foi le sao o Alii ma Faipule i lea faamoemoe auā o alii ma faipule o loo ta’ui ma afifi ai le tele o tatou faasinomaga faaleaganuu.

O le talitonuga o le alii Minisita o le tofa tatala, ma le utaga sasaa, o le a tofu faalumaga ai alo ma fanau o o outou afioaga aemaise Samoa mo a taeao, e lē gata i lea ia mautinoa e faaauau, e ola ola pea, ma faatumauina le aganuu mo le lumanai.

I lea lava faamoemoe na molimauina ai foi teuteuga fou o le faaaliga o ata a le ausiva a faiaoga i lo latou sao i le faatāuaina ma le faamamaluina o faafiafiaga ma fatuga faasamoa moni.

Saunoa Seuula o lea galuega, ua atagia ai foi le sao o le ausiva a faiaoga i nisi o faaaliga o tu ma aganuu a le Pasefika sa auai ma faafiafia ai.

E lē gata o le sao i le faaauauina, faasaoina ma le faaaogāina o taga, o aga, o metotia ma fatuga faasamoa moni, ae o lo latou sao lava lea i le faaolaola o siva Samoa o se vaega o le aganuu.