Fai mai o le a faaitiitia e le kamupani vaalele a le Ea Niu Sila ana faigamalaga mo le isi ono masina ona o le tele o le aufaigaluega ua aafia i gasegase ae lē gata i lea o le a faaitiitia foi le aofa’i o nofoa e faatau i faigamalaga.
O lona uiga pe lata i le 100 afe pasese e ono toe faalēaogāina mai a latou faigamalaga e lē gata i malaga i totonu lava o Niu Sila ae faapea foi i malaga faavaomalo ona o lenei fuafuaga.
Fai mai le kamupani i se pepa o faamatalaga o le tele o pasese o loo aafia i suiga nei o le a toe sui ane lava o latou avanoa i se isi malaga i lea lava aso mo malaga i totonu o le atunuu ae mo malaga faavaomalo afai e lē maua se avanoa i se isi malaga i le aso lava lea ona toe fetuuna’i lea i le isi aso e sosoo ai. O loo iai foi le avanoa e toe suia ai i nisi aso a latou bookings pe toe talosaga foi e faafoi ane le tupe.
Fai mai le pulega o le taimi nei ua lē ‘asa se atunuu ma fetuuna’iga i le tulaga o faigamalaga ona o mafuaaga e aofia ai le aafia o le aufaigaluega i gasegase aemaise i le pepesi malosi o le fulū masani faapea foi le koviti ma isi gasegase.
