Ua faailoa e le Pulega o le Matagaluega o Leoleo ma Falepuipui le faaitiitia o solitulafono talu ona taofi le toe faatauina i le atunuu o le ‘ava malosi ina ua tapunia le tele o auaunaga masani ona o puipuiga o le faama’i.
Ua faailoa e le Sui Komesina o Leoleo le susuga Auapaau Logoitino Filipo a tele lava le solitulafono i le aso e ripotia atu o le tolu seia vagana solitulafono tau talepe fale o loo tutupu ma alia’e mai pea.
Ua savali nei i le 4 vaiaso talu ona taofia i aiaiga o vavao e toe faatauina i tua e faleoloa uma o le atunuu le ava malosi. Ua taofia ai foi ma fefaatauaiga masani i le va o kamupani o gaosia lea oloa ma pisinisi tau faleoloa.
Faaalia foi e Auapaau ua fesoasoani tele le pitolaau a malu o le malo e faamalosia aiaiga o vavao le faaititia o mataupu tau solitulafono e mafua mai i le ava malosi. E 5 ni pisinisi ua faasala i le ta’i $5000 tala i aiaiga o vavao ona ua o latou faatau atu i tua lea oloa.
E le’o iloa se taimi e toe tatala ai le faatauina o le ava malosi aemaise lava i pisinisi o falekalapu o loo tapunia pea i le taimi nei e masani ona faatau ai le ava malosi. O loo tapu foi ona faatau i totonu o faletalimalo ma isi nofoaga e faia ai sauniga e pei o fiafia o faaipoipoga ma aso fanau.
