Ua lua lipoti sosoo o le pipisi o le faama’i Koviti-19 poo le korona vairusi mai le matagaluega o le soifua maloloina ua molimauina ai pea ua i lalo o le to’a selau gasegase fou.

O le lua aso talu ai mai le Aso Toonai na te’a nei e oo mai i le Aso Gafua o le vaiaso nei e 19 gasegase fou, ae o le lipoti o le fā aso na amata mai i le aso 5 i le aso 9 o Iulai e to’a 63 tagata na aafia i le siama ma le vairusi o le koviti. O le to’a 19 o gasegase fou mai le aso 9 i le aso 11 o Iulai e to’alua o pasese mai le malaga a le Fiji Airways o le Aso Toonai na te’a nei.

O faamaumauga lata mai nei ua oo atu ai le aofa’iga atoa o ē ua aafia i le faama’i i lo tatou atunuu i latou ia mai le lautele o tagata ma pasese e malaga mai fafo i le 15,134.  

I se tasi o tala mai le tautua a le matagaluega o le soifua maloloina o lea ua faagasolo le galuega o le tuipuipui mo le faama’i o le fiva taifoi i fale faigaluega o pisinisi tuma’oti ma matagaluega faapea faalapotopotoga a le Malo.

Ua faailoa e le soifua maloloina i luga o auala o fesoota’iga o le tuipuipui mo lea faama’i o loo maua mai le auaunaga a le maota gasegase autu i Motootua faapea falema’i faaitumalo uma i le atunuu. Ua iai foi le fuafuaga a le matagaluega e faagasolo le tuipuipui o le fiva taifoi i a’oga uma i Upolu ma Savaii.