E ui ina e lei manuia taumafaiga a malo laiti tau atia’e e pei o Samoa i lana finauga ma malo tetele i le fono talu ai nei a Malo Aufaatasi, sa autu i le talanoaina o auala ma polokalame e fesoasoani ai i aafiaga o atunuu laiti mai suiga o le tau, peitai e leo faavaivai ai atunuu laiti tau atia’e e lagolago atu i taumafaiga uma mo le faasaoina o le tatou paneta mai suiga mā’ale’ale o le tau.
O le Aso Tofi ma le Aso Faraile o lenei vaiaso ua faailoga ai e Samoa le aso e faatāua ai malosiaga faafouina poo le National Renewable Energy Day.
O se aso tāua tele e pei ona faailoa i le polokalame e tatala i le maota o le Tooa Salamasina i le taeao o lenei Aso Tofi i Samoa, i se fonotaga a tupulaga talavou o le a autū i le ulutala faaperetania, o le Global Shapers.
O se tasi foi o mataupu o le a soālaupule ai o le faasaoina o le osone mai kasa oona e pei o kaponi i le faaaoga o taavale e ola i le eletise ae lē o suāu’u ma penisini. O se taamilosaga soka taitoafitu o le a faaiu iai polokalame o le aso o malosiaga faafouina e faia i le malae soka faavaomalo i Tuanaimato i le Aso Faraile.
