Ua faailoa e le matagaluega o le ofisa o tiute ma tupe maua ni suiga fou o le a mataitu lelei ai le faagaioia o soo se pisinisi i totonu o Samoa, ina ua faia ni teuteuga i le tulafono faatonutonu a lea matagaluega e pei o se tasi o teuteuga na faaofi i le fa tausaga ua mavae, ae e foliga mai e lei faamalosia.

O lea teuteuga o le a faailoa ai tagata tonu e ana pisinisi poo Business owners. O se suiga e amata faamamalu i le tausaga fou 2023 o loo foufou mai, ma ua faaalia e le sui ofisa sili o pulega o lea matagaluega o loo feagai ma le aoina o seleni mai lafoga ma tiute, o le a sologa lelei ai le vaaia ma le mataituina o le faagaioia o pisinisi i le atunuu.

O se suiga foi ua faaalia e le sui ofisa sili le tofa Seumanu Ieni Asani Sheppard i se pepa o faamatalaga, o le a mataitu ai ma tagata mai fafo e malaga mai i le atunuu ma fia faatuina se taumafaiga tau pisinisi.

O lea suiga e pei ona faaalia e le sui ofisa sili o pulega o le matagaluega o tiute ma tupe maua, o le a laugatasia uma ai pisinisi i se faiga e mafai ai ona iloa lelei tupe o a latou lafoga e tatau ona totogi aemaise lava o le a faatino foi i le tausaga fou, se tasi o suiga, o le le toe agavaa lea o pisinisi ei lalo o le 200 afe tala i le tausaga ana tupe maua ona aofia i totonu o le faiga ua ta’ua o le TIMS poo le Tax Invoice Monitoring System.

O lona uiga ua na o pisinisi e i luga o le 200 afe tala tupe maua ma sili atu o le a mataitu i lea faiga a latou tupe maua ma fua iai lafoga e tatau ona totogi atu i le Malo.

E pei ona silafia o le matagaluega o tupe maua lea o loo iai ma le vaaia o lafoga totogi i soo se auaunaga, o le lima taumatau lea o le Malo i tupe maua e aoina mai auā le faatinoina o fuafuaga o galuega fai a le Malo i tausaga uma.