Palota Samoa

Faailoa nisi o tapenaga a le Ofisa o Faigapalota mo le palota laititi

O loo faagasolo pea tapenaga a le Ofisa o Faigapalota a le atunuu a’o loma ai faigapalota laiti mo itumalo e 7 lea o loo avanoa o latou nofoa i le Palemene. 

E pei ona silafia ua faamautu mai le Aso 26 Novema e faataunuu ai lea fuafuaga taua aua le sailia ai o sui faipule e atoa iai le numera o faipule e tatau ona i totonu o le Palemene. I se faatalatalanoaga a le Niusipepa o le Savali ma le Komesina o Faigapalota afioga Faimalomatumua Mathew Lemisio na ia faailoa ai ua mautū le tele o tapenaga.

“Tapenaga latou ia ua tele ina taatitia uma vaega o loo manaomia ma o le vaiaso nei lea na agai ai le tatou le Ofisa i le vaega o le resitala e agai atu loa i tua i itumalo ia e 7 amata atu le Aso 26 o Oketopa”.

Taua foi e Faimalomatumua “Silafia foi o le 7 o nofoa o loo avanoa nei o le 3 o nofoa na avanoa ona ua faamavae ia sui sa palotaina mai le palota tele o lona uiga la e ese le vaega o le tulafono e apalai ai i vaega ia e tolu lea e ala ai ona iai le aso atofaina e tapuni ai lola a’o le isi fa (itumalo) lea ua avanoa nofoa ona o le poloaiga a le faamasinoga o le vaega lena e lē mafai ona toe fai se suiga i lola”.

O le Aso Faraile nei 29 o Oketopa o le ā tapunia ai loa lola palota a itumalo e 3 e aofia ai Falealupo, Sagaga No.4 ma Safata No.2 ae tatala ai loa le faauluina o sui tauva i le Aso 1 o Novema ae tapunia i le Aso Faraile 5 o Novema.

O le a tagatagai foi le Ofisa o faigapalota e talosagaina le fesoasoani a Ofisa Sili o Matagaluega eseese a le Mālō ina ia faavasega tagata faigaluega a le Mālō e galulue i le faatinoga o palota laiti i le masina fou.

O le vaiaso fou o le a mautinoa ai loa le lisi aloaia o sui tauva o le a tamomoe mo le faigapalota laiti e ui ua faailoa mai e vaega faaupufai e lua a latou sui tauva i luga o upega tafailagi ae o le lisi aloaia e faa mautinoa lea i le vaiaso fou. 

Share on facebook
Share on twitter
Share on email
Share on whatsapp
Scroll to Top

Keep uptodate with Radio Samoa activity & promotion

* indicates required