Samoa Palota

Faailoa nisi o sui tauva mo le palota laititi a Safata No.2

E toatasi le sui faatū o le vaega faaupufai e Puipuia Aia Tatau o Tagata le HRPP ua faamautu o le a tauva i le faigapalota laititi mo le nofoa o le itumalo faapalota o Safata No.2 le afioga ia Nonu Te’o Lomialagi Lose Niumata.

Ua faailoa lea tulaga e le failautusi o le vaega faaupufai a le HRPP susuga Lealailepule Rimoni Aiafi i luga o auala o fesootaiga a le patī e Puipuia Aia Tatau o Tagata. Na faafetaia ai e le failautusi le finagalo faatamalii ma le saili malo o isi o latou sui faatutū na tauva i le palota tele ia Aperila aua o lea ua tapuai ae ave le latou lagolago i le afioga ia Nonu Te’o sa manumalo i le palota tele i le filifiliga a le itumalo.

Na tulaga lua i lea faiga filifiliga le sui tauva o le vaega faaupufai a le Faatuatua i le Atua Samoa ua Tasi le susuga Laumatiamanu Mathew Ringo Purcell. O ia lea na faaulu se tagi o moliaga faatosina faasaga i le sui na manumalo peitai na fausia se maliega e toe faasolomuli i tua le mataupu ma faamavae le sui na manumalo ae toe foi e saili le finagalo o Safata No.2.

E to’a tasi le sui tauva o le vaega faaupufai o le Tautua Samoa na tauva ai foi i le palota tele ma e leo mautinoa pe toe tauva i le faigapalota laititi. O lea ua mautinoa o le a toe tauva le sui o le FAST i le palota laititi a lea itumalo faapalota.

O loo tālia nei le faasilasilaga mai le Ofisa o le Fofoga Fetalai faapea le Ofisa o Faigapalota i le aso o le a faia ai palota laiti e 7 e toe saili ai sui o ia itumalo ua avanoa nofoa ona o le taunuuga o faamasinoga o tagi o faatosina e mafua i le palota tele i le masina o Aperila. 

Share on facebook
Share on twitter
Share on email
Share on whatsapp
Scroll to Top

Keep uptodate with Radio Samoa activity & promotion

* indicates required